Deu 6 | JAE | STEP | Go Mose kêsôm gebe “Biŋsu to ŋagôliŋ ma jatu tau, taŋ Apômtau, amacnêm Anôtô kêjatu aê, gebe jandôŋ êndêŋ amac gebe aŋgôm ŋanô êsa aŋga gamêŋ, taŋ alom ana gebe awê kaiŋ êtu amacnêm gamêŋ naŋ, tonec.

Deuteronomy 6

Biŋsu towae

1 Go Mose kêsôm gebe “Biŋsu to ŋagôliŋ ma jatu tau, taŋ Apômtau, amacnêm Anôtô kêjatu aê, gebe jandôŋ êndêŋ amac gebe aŋgôm ŋanô êsa aŋga gamêŋ, taŋ alom ana gebe awê kaiŋ êtu amacnêm gamêŋ naŋ, tonec. 2 Gebe aôm ma latômi to dêbômi atêc Apômtau, aômnêm Anôtô, ma aŋgôm biŋsu to ŋagôliŋ samob, taŋ kajatu amac naŋ, ŋanô êsa êndêŋ nêm têm amoa matem jaliŋa, gebe aŋgôŋ ŋasawa ŋêŋgeŋ aŋga nom. 3 Amboac tonaŋ amac lau Israel, aŋô biŋsu tau to aŋgôm ŋanô êsa ŋapep, gebe amoa ŋajamgeŋ ma atu taêsam aŋga gamêŋ, taŋ su to lêp keseleŋ naŋ, êtôm taŋ amac tameminêŋ Anôtô gêjac mata gêdêŋ amac naŋ.

4 “O Israel, ôkêŋ taŋammaŋ. Apômtau, aêacnêŋ Anôtô, eŋ Apômtau tageŋ. 5 Têmtac êwiŋ Apômtau, aômnêm Anôtô, tonêm ŋalêlôm samuc ma nêm katôm samuc ma nêm ŋaclai samuc. 6 Ma oto biŋ, tec galoc jajatu aôm nec, êsêp nêm ŋalêlôm. 7 Ôndôŋ biŋ tau êndêŋ nêm gôlôac ma embe ôlêwaŋ taôm ôŋgôŋ nêm andu me ôsêlêŋ ômoa intêna me êndêŋ noc ônêc bêc to ôndi saŋa naŋ, ôsôm biŋ tau ŋakôniŋŋa amboac tonaŋgeŋ. 8 Ôkic biŋ tau tôŋ êpi lêmam êtu ŋabelo to ombec biŋ tau êtôm ŋatalô. 9 Oto biŋ tau êpi nêm andu ŋasagiŋtêkwa sacgêdôŋa to êpi nêm katam tau.

10 “Êndêŋ taŋ Apômtau, aômnêm Anôtô, êwê aôm naô lasê gamêŋ, taŋ eŋ kêtôc lêma gêdêŋ tamami Abraham agêc Isak ma Jakob gebe êkêŋ êndêŋ aôm naŋ, ma êkêŋ malac kapôêŋ to ŋajam, taŋ aôm kôkwê atom naŋ, 11 ma êkêŋ andu toawa tokaiŋ-tokaiŋ, taŋ aôm kotoc gêc andu tau atom naŋ, ma êkêŋ kôm wain to katêkwiŋa, taŋ aôm kôsê atom naŋ, ma êndêŋ taŋ ôniŋ gêŋ tau e êôc aôm tôŋ naŋ, 12 Ojop taôm gebe ôliŋ Apômtau siŋ atom, gebe eŋ tec gêwê aôm kôsa aŋga gamêŋ Aiguptuŋa, taŋ kêtôm andu kapoacwalôŋa naŋ, gômôêŋ. 13 Ôtêc Apômtau, aômnêm Anôtô, to ônam sakiŋ eŋ ma ôtôc lêmam ŋa ênê ŋaê. 14 Andaŋguc lau tomôkê-tomôkê, taŋ sêgi amac auc naŋ, nêŋ anôtôi jaba atom, 15 gebe Apômtau, amacnêm Anôtô, taŋ gêmoa amac ŋalêlôm naŋ, gêjam lêmuŋ nê lau, gebe têntac êwiŋ eŋ taugeŋ. Embe andaŋguc anôtôi jaba, oc Apômtau, amacnêm Anôtô, têtac ŋandaŋ êsa êndêŋ amac e enseŋ amac su anaŋa aŋga nom.

16 “Ansaê Apômtau, amacnêm Anôtô, amboac asaê eŋ aŋga Masa nec atom. 17 Aŋgôm Apômtau, amacnêm Anôtô, nê biŋsu to ŋagôliŋ ma jatu, taŋ kêjatu amac naŋ, ŋanô êsa. 18 Ma ôŋgôm gêŋ gêdêŋ to ŋajam ênac Apômtau mataanôgeŋ ômoa ŋajamgeŋ ma ôsa gamêŋ ŋajam ôna gebe ôwê kaiŋ êtu aômnêm gamêŋ êtôm Apômtau kêtôc lêma, gebe êkêŋ êndêŋ tamami. 19 Eŋ êjanda nêm ŋacjo êmuŋ aôm êtôm eŋ tau gêjac mata.

20 “Embe latôm êtu kênac aôm êtu ŋamu gebe ‘Biŋsu to ŋagôliŋ ma jatu, taŋ Apômtau, aêacnêŋ Anôtô, kêjatu amac naŋ, ŋam amboac ondoc,’ 21 go ôsôm êndêŋ latôm gebe ‘Aêac atu Paraonê sakiŋwaga, ma Apômtau gêwê aêac ŋa lêma ŋajaŋa asa aŋga Aiguptu amêŋ. 22 Ma Apômtau kêtôc gêŋtalô to gêŋsêga kapôêŋ, taŋ kêtakê lau Aiguptu ma Parao to nê gôlôac samob gêdêŋ aêac mateŋanô alic. 23 Mago eŋ gêwê aêac asa aŋga ônê amêŋ, gebe êkêŋ aêac naaô lasê gamêŋ, taŋ kêtôc lêma gêdêŋ tameŋi, gebe êkêŋ êndêŋ aêac naŋ. 24 Ma Apômtau kêjatu aêac gebe daŋgôm ênê biŋsu samob tonec ŋai ŋanô êsa to tatêc Apômtau, aêacnêŋ Anôtô, gebe tamoa ŋajam ŋapaŋ ma eŋ ejop aêac tamoa mateŋ jali êtôm tec galoc tamoa nec. 25 Ma aêac embe daŋgôm biŋsu samob tonaŋ ŋanô êsa e ŋapepgeŋ takô Apômtau, aêacnêŋ Anôtô, laŋônêmŋa êtôm tec kêjatu aêac nec, go tatu lau gêdêŋ.’